የምሳ ሰዓት ደርሷል ከሰዓት ኑ፤ አሁን የሻይ ሰዓት ነው፤ የመውጫ ሰዓት ስለ ደረሰ ሌላ ጊዜ ብቅ በሉ፤ አለቃ የሉም ነገ ተመለሱ፤ ቀጠሮ ሳያስይዙ አለቃን ማግኘት አይቻልም፤ እኔን አይመለከተኝም ሌላ ቢሮ ቁጥር ሂዱ፤ እንዲህ ለማድረግ አሠራሩ አይፈቅድም፣ ከዚህ በላይ ባንከራከር ጥሩ ነው፣ አልሠራም፣ አልሠራም ቢሮውን ለቃችሁ ውጡ እና መሰል ውጣ ውረዶች ዘመናቸው እያለቀ ይመስላል።
እኒያ ድሃ የማይስተናገድባቸው፤ እጃቸውን የሚዘረጉ ሰዎች ያሻቸውን የሚያስፈጽሙባቸው፤ ለደሃ መታወቂያ የሚነፈግባቸው፤ በእጁ ለሚሄድ ደግሞ በፈለጉት ቁጥር ልክ መታወቂያ የሚታደልባቸው፤ የማያልቅ ሰልፍ የማይጠፈባቸው ሥፍራዎች መለወጥ የጀመሩ ይመስላል።
ቀድም ሲል አገልግሎት ሳይኾን እንግልት ይበዛባቸው የነበሩ ተቋማት አገልግሎት መስጠት ጀምረዋል። አሁን ደሀዎችም ሀብታሞችም በአንድነት አገልግሎት የሚያገኙበት፤ እጅ መንሻ የቀረበት፤ ደጅ መጥናት የራቀበት ጊዜ የመጣ ይመስላል።
አሁን በወረቀት የተሞሉ መጋዝን የሚመስሉ ቢሮዎች፣ ጎታች እና የሚያንገላቱ ባለሙያዎች፣ ለአገልግሎት ማግኛ የሚወጣው ጊዜ እና ገንዘብ ከሚገኘው አገልግሎት የሚበልጥባቸው ውጣ ውረዶች መቀየር ጀምረዋል።
በለስ ሲቀና በሳምንት፣ እንዲያም ሲል በወራት እና በዓመት የሚፈጸሙ አገልግሎቶች ከረዘሙ በሰዓታት የሚፈጽሙበት ጊዜ መጥቷል።
ኢትዮጵያ ለዓመታት ሕዝብን ያማረሩ የአገልግሎት አሠጣጥ ችግሮችን ለመፍታት ጉዞ ጀምራለች። ጉዞውን በስኬት ለማጠናቀቅ አድካሚ ቢኾንም ሂደቱ እና ውጤቱ ግን ፍሬው ያማረ ነው።
በኢትዮጵያ የተጀመረው መሶብ የአንድ ማዕከል አገልግሎት ሕዝብን ያማረሩ ችግሮችን መፍታት ጀምሯል። ዜጎችም እፎይ ማለት ጀምረዋል። መሶብ የአንድ ማዕከል አገልግሎት ከአገልግሎት በላይ ነው።
መሶብ የአንድ ማዕከል አገልግሎት ከተጀመረባቸው ከተሞች መካከል ባሕር ዳር ከተማ አንደኛዋ ናት። ይህ አገልግሎት የዜጎችን እንግልት እያስቀረ ነው።
በባሕር ዳር መሶብ የአንድ ማዕከል አገልግሎት መንጃ ፈቃድ ለማሳደስ መጥቶ አሚኮ ያገኘው ወጣት አባት አያሌው ከአሥር ደቂቃዎች ባልበለጠ ጊዜ የመንጃ ፈቃድ እድሳቱን ማጠናቀቁን ገልጿል።
ከአሁን ቀደም መንጃ ፈቃድ ለማደስ እና ለማውጣት ረጅም ጊዜ ይወስድባቸው እንደነበር ተናግሯል። “ለቀናት እንመላለስ ነበር፤ አሁን ግን በደቂቃዎች ጨርሼ ወጥቻለሁ፤ በአገልግሎት አሰጣጡ ተደስቻለሁ” ነው ያለው።
መብራት የለም፤ አገልግሎት የሚሰጠው ሰው የለም እና ሌሎች ሰበቦች ቀርተው በፍጥነት አገልግሎት እየተሰጠ ነው፤ ይህም ታላቅ ለውጥ ነው ብሏል። የቀድሞው እና የአሁኑ አገልግሎት ፈጽሞ የማይገናኝ ነው፤ ከዚህ በኋላ የሕዝብ ምሬት እንደሚቀር ተስፋ አለኝ ነው ያለው።
ሌላው መንጃ ፈቃድ ለማሳደስ መጥቶ አሚኮ ያገኘው ወጣት በላይነው ስጦታው አገልግሎት ለማግኘት ለቀናት መመላለስ ቀርቷል፤ በደቂቃዎች አገልግሎት አግኝቻለሁ፤ በየተቋማቱ የነበረው መጉላላት እና እንግልት ቀርቷል ብሏል። የመሶብ የአንድ ማዕከል አገልግሎት የሕዝብን እንግልት እያስቀረ ነው፤ ሁሉም እየመጣ አገልግሎቱን ማግኘት አለበት ነው ያለው።
“በመደመር መንግሥት ዕይታ፣ የዘርፎች ዕምርታ” በሚል መሪ መልዕክት እየሰለጠኑ የሚገኙ የአማራ ክልል ከፍተኛ እና መካከለኛ መሪዎች የባሕር ዳር መሶብ የአንድ ማዕከል አገልግሎትን ጎብኝተዋል። መሶብ የአንድ ማዕከል አገልግሎት ሕዝብ በተደጋጋሚ ሲያነሳ የነበረውን የአገልግሎት አሰጣጥ የሚፈታ ነው ብለዋል።
የማዕከላዊ ጎንደር ዞን ብልጽግና ፓርቲ ቅርንጫፍ ጽሕፈት ቤት የአደረጃጀት ዘርፍ ምክትል ኀላፊ ሻሼ ድረስ መሶብ የአንድ ማዕከል አገልግሎት በትክክልም ችግር እየፈታ እንደኾነ አይቻለሁ ነው ያሉት።
ጥራት ያለው አገልግሎት እየተሰጠ እንደኾነ አይተናል፤ ይህን የመሰለውን አገልግሎት ወደ አካባቢያችን ወስደን ለመተግበር መነሳሳት ፈጥሮልናል ነው ያሉት። ሥልጣናው ሕዝብን የሚጠቅሙ ሥራዎችን እንድንሠራ የሚያበረታታ ነው ብለዋል።
በሰሜን ጎንደር ዞን የማይጠብሪ ከተማ አሥተዳደር ከንቲባ በርሄ መኮንን በሥልጠና የተማርናቸው ለውጦችን መሬት ላይም አይተናቸዋል ነው ያሉት።
መሶብ የአንድ ማዕከል አገልግሎት የሕዝብን የዘመናት ጥያቄ የሚፈታ፤ ቅሬታን እና እንግልትን የሚያስቀር፣ በሁሉም አካባቢዎች መዳረስ ያለበት ነው ብለዋል።
በመሶብ የአንድ ማዕከል አገልግሎት ያየነውን ተሞክሮ በየአካባቢያችን ለማስፋት እንሠራለን ነው ያሉት። ቀበሌ ላይ የአገልግሎት አሰጣጥን ማሻሻል ካልተቻለ የሕዝብ ቅሬታ ስለማይቀር እስከታች ለማውረድ እንሠራለን ብለዋል።
የከሚሴ ከተማ አሥተዳደር ምክትል ከንቲባ አረቡ አሊ መሶብ የአንድ ማዕከል አገልግሎት የሕዝብን ችግሮች የሚፈታ መኾኑን ተናግረዋል። መንግሥት የአገልግሎት አሰጣጥን ለማሻሻል እንደሚሠራ ቃል የገባቸውን እየፈጸመ እንደኾነ ማሳያ ነው፤ መሶብ የአንድ ማዕከል አገልግሎት ብልሹ አሠራርን የሚያስቀር ነው ብለዋል። መሶብ የአንድ ማዕከል አገልግሎት በሁሉም አካባቢዎች መስፋፋት እንዳለበት ተሞክሮ ወስደናል ነው ያሉት። እየተሠሩ ያሉ ሥራዎች የበለጠ እንዲሠሩም የሚያደርጉ መኾናቸውን ተናግረዋል።
የባሕር ዳር ከተማ አሥተዳደር የስማርት ባሕር ዳር ፕሮጄክት ጽሕፈት ቤት ተወካይ አስተባባሪ ሰውነት አስማረ መሶብ የአንድ ማዕከል አገልግሎት ፈጣን፣ ቀልጣፋ እና ጥራት ያለው አገልግሎት ለመስጠት የተቋቋመ መኾኑን ገልጸዋል። በማዕከሉ የኢትዮ ቴሌኮም እና የባንክ አገልግሎትን ጨምሮ 11 ተቋማት ገብተዋል፤ 48 አገልገሎቶች እየተሠጡም ነው ብለዋል።
ለማኅበረሰቡ ፈጣን፣ ቀልጣፋ እና ጥራት ያለው አገልግሎት እየተሰጠ መኾኑን ነው ያነሱት። ተገልጋዮች በአንድ ማዕከል በርከት ያሉ አገልግሎቶችን በአጭር ጊዜ አግኝተው ይሄዳሉ፤ አገልግሎት ለማግኘት ሲያጠፉት የነበረውን ጊዜ ለግላቸው ሥራ ያውላሉ፤ የግለሰቦች የሥራ ውጤት ደግሞ ሀገር ይገነባል ነው ያሉት።
በመሶብ የአንድ ማዕከል አገልግሎት ጥናት እየተደረገ አገልግሎቶች እየጨመሩ እንደሚሄዱም አስታውቀዋል። ማኅበረሰቡ አገልግሎት ለማግኘት እንዲመጣም ጥሪ አቅርበዋል። ስማርት ባሕርዳርን ለመገንባት በርካታ ሥራዎች እየተሠሩ መኾናቸውንም አመላክተዋል ሲል የዘገበዉ አሚኮ ነዉ።
