የባሕር ዳር ከተማን ዘላቂ እድገት በሚያረጋግጥ አግባብ የተለያዩ የልማት ስራዎች ተጠናክረው እንደሚቀጥሉ የከተማ አስተዳደሩ ተቀዳሚ ምክትል ከንቲባ ጎሹ እንዳላማው ገለጹ።
በ“የመደመር መንግስት እይታ የዘርፎች እመርታ” በሚል መሪ ሀሳብ ስልጠና ሲከታተሉ የቆዩ የአማራ ክልል ከፍተኛና መካከለኛ አመራሮች በባሕር ዳር ከተማ የተከናወኑ የልማት ስራዎችን ተዘዋውረው ተመልክተዋል።
አመራሮቹ ከተመለከቷቸው የልማት ስራዎች መካከል የባሕር ዳር ኮሪደር ልማት፣ መሶብ የአንድ ማዕከል አገልግሎት፣ የራባል ብረታ ብረት፣ ኮከብ ኢንዱስትሪ ግራናይት ማምረቻ ፋብሪካ እና ሌሎችም ይጠቀሳሉ።
ከጉብኝቱ በኋላ ማብራሪያ የሰጡት የባሕር ዳር ከተማ ተቀዳሚ ምክትል ከንቲባ ጎሹ እንዳላማው፤ የልማት ሰራዎቹ ከተማዋን ለነዋሪዎች፣ ለጎብኚዎች እና ለኢንዱስትሪ ልማት ምቹ የማድረግ ጥረት መሆኑን ገልጸዋል።
በከተማው በዚህ ዓመት የ42 ትላልቅ ፕሮጀክቶች ስራ እየተከናወነ መሆኑን ጠቅሰው፤ ለፕሮጀክቶቹ ከመንግስት በተጨማሪ ነዋሪዎች፣ ባለሀብቶችና ተቋማት ድጋፍ እያደረ መሆኑን ተናግረዋል።
በከተማው በልዩ ክትትልና ቁጥጥር እየተከናወነ ያለው የኮሪደር ልማት የመንግስትን ፕሮጀክቶችን ጀምሮ ማጠናቀቅ በተግባር የተረጋገጠበት መሆኑንም አንስተዋል።
የባሕር ዳር ከተማን ዘላቂ እድገት በሚያረጋግጥ አግባብ የተለያዩ የልማት ስራዎች ተጠናክረው የሚቀጥሉ መሆኑንም ገልጸዋል ሲል ኢዜአ ዘግቧል።
