“የመደመር መንግሥት እይታ የዘርፎች እመርታ” በሚል መሪ መልዕክት ሢሠለጥኑ የቆዩት የሥራ ኀላፊዎች በባሕር ዳር ከተማ የተለያዩ የልማት ሥራዎችን ጎብኝተዋል።
ከጎበኟቸው የልማት ሥራዎች ውስጥ ራቫል ብረታ ብረት ማምረቻ ፋብሪካ አንዱ ነው። ፋብሪካው በ10 ሄክታር መሬት ያረፈ፣ 4 ነጥብ 2 ቢሊዮን ብር ካፒታል ያስመዘገበ እና ለ517 ወጣቶች የሥራ ዕድል የፈጠረ ነው።
ፋብሪካው የሚቀልጡ እና የወዳደቁ ብረታ ብረቶችን ጭምር በማምረት ላይ ይገኛል። በግጭቱ ሥራ ሳያቆም የተለያዩ የብረት ውጤቶችን በማምረት እያቀረበ የሚገኝም ፋብሪካ ነው።
የባሕር ዳር ከተማ አሥተዳደር በምክትል ከንቲባ ማዕረግ የኢንዱስትሪ እና ኢንቨስትመንት መምሪያ ኀላፊ ብርሃን ንጉሴ በከተማ አሥተዳደሩ አራት ሁለገብ የኢንዱስትሪ መንደሮች እንደሚገኙ ጠቁመዋል።
የኢንዱስትሪ መንደሮቹ 921 ሄክታር መሬት የተዘጋጀላቸው ናቸው። ከእነዚህ ውስጥ 663 ባለሀብቶች በማኑፋክቸሪንግ ኢንዱስትሪ የተሠማሩ መኾናቸውን ገልጸዋል።
አሁን ላይ በከተማ አሥተዳደሩ በሚገኙ አራቱ የኢንዱስትሪ መንደሮች እና ከኢንዱስትሪ መንደሮች ውጭ 268 ኢንዱስትሪዎች በሥራ ላይ ይገኛል ነው ያሉት።
እነዚህ ፋብሪካዎች ምግብ እና ምግብ ነክ፤ እንጨት እና ብረታ ብረት፣ ጋርመንት፣ ቆዳ እና ኬሚካል ዘርፎች ላይ ትኩረት ያደረጉ ናቸው።
በከተማ አሥተዳደሩ ከሚገኙ ፋብሪካዎች ውስጥ ደግሞ 67 ኢንዱስትሪዎች ስትራቴጂክ ተኪ ምርቶችን በማምረት ላይ ይገኛሉ ብለዋል። 13 ኢንዱስትሪዎች ደግሞ ምርቶቻቸውን ወደ ውጭ በመላክ ላይ ይገኛሉ ነው ያሉት። በዚህ ዓመት አምስት ኢንዱስትሪዎች ወደ ሥራ ገብተዋል። 51 ኢንዱስትሪዎች ማሽን ተከላ ላይ እንደሚገኙም ገልጸዋል።
ሥራ በጀመሩ ኢንዱስትሪዎች ከ10 ሺህ በላይ ወጣቶች ቋሚ፣ ከ7 ሺህ በላይ ደግሞ ጊዜያዊ የሥራ ዕድል ተፈጥሮላቸዋል ነው ያሉት። ፋብሪካዎች በሙሉ አቅም እንዲያመርቱ ዞኖች ሰላምን ከማረጋገጥ ባለፈ የኢንዱስትሪ ግብዓት ማምረት ላይ ትኩረት አድርገው እንዲሠሩም ጠይቀዋል።
ያነጋገርናቸው ጎብኝዎች እንዳሉት ፋብሪካው ወደ ኢንዱስትሪ የሚያደረገውን ሽግግር የሚያፋጥን፣ በዘርፉ የተሠማራውን የሰው ኃይል አቅም የሚያጎለብት መኾኑን ገልጸዋል።
ለበርካታ ወጣቶችም የሥራ ዕድል መፍጠር የሚችል አቅም ያለው መኾኑንም ገልጸዋል። በሌሎች አካባቢዎች በሰላም ችግር የቆሙ ፋብሪካዎችንም ወደ ሥራ እንዲመለሱ ሰላሙ ላይ እንደሚሠሩ ነው የተናገሩት።
