ኅዳር 18/2018 ዓ.ም) “በመደመር መንግሥት ዕይታ፣ የዘርፎች እምርታ” በሚል መሪ መልዕክት ለአማራ ክልል ከፍተኛ እና መካከለኛ መሪዎች ሥልጠና እየተሰጠ ነው።
እስካሁን በተሰጡ የሥልጠና ርእሰ ጉዳዮች ላይ የማጠቃለያ ሃሳብ የሰጡት የአማራ ክልል ርእሰ መሥተዳድር አረጋ ከበደ “በሥልጠና ያገኛችሁትን ዕውቀት ወደ ተግባር መቀየር ከቻላችሁ ለውጥ ማምጣት ይቻላል” ብለዋል። የግብርናውን ዘርፍ መለወጥ እንደሚገባ ያነሱት ርእሰ መሥተዳድሩ ግብርናውን ማዘመን ግድ እንደሚል ገልጸዋል።
ኋላቀር የኾነ የማረሻ ዘዴን እና የአሥተራስ መንገድን በቴክኖሎጂ መቀየር እንደሚገባም ተናግረዋል። ግብርናውን ከዕለት ጉርስ የተሻገረ እንዲኾን ማድረግ እንደሚያስፈልግም አመላክተዋል።
የግብርና ምርት እና ምርታማነትን ሊያሳድጉ የሚችሉ ሥራዎችን መሥራት እንደሚጠበቅም ገልጸዋል። መሪዎች ለውጥ የሚያመጣ፣ እሴት የሚጨምር ሥራ መሥራት እንደሚጠበቅባቸውም ተናግረዋል።
በግብርናው ዘርፍ ለውጥ ሲመጣ የገጠር ትራንስፎርሜሽን ማምጣት እንደሚቻል ገልጸዋል። የገጠር ትራንስፎርሜሽን ለማምጣት ቀዳሚው ጉዳይ ዘመናዊ ግብርናን መፍጠር አስፈላጊ ነው ብለዋል።
የግብርና ትራስፎርሜሽን ለማምጣት ባሕላዊ አሠራሮችን እንቀንስ፣ ዘመናዊ አሠራሮችን እንጨምር ነው ያሉት ፕሬዝዳንቱ። ከባለፈው ችግር እየተላቀቅን እንሂድ፣ አዳዲስ አሠራሮችን እንተግብር ብለዋል።
ከፍጆታ አልፎ ለኢንዱስትሪ ግብዓት የሚኾን እና ለውጭ ገበያ የሚያቀርቡ አርሶ አደሮችን መፍጠር እንደሚገባም አመላክተዋል።
ራዕይ ያለን፣ ግብ ያስቀመጥን ነን ያሉት ርእሰ መሥተዳድሩ የምንፈታው ችግር፤ የምናሳካው ውጤት አለን፤ ብዙ ጸጋዎች አሉን፣ በቁርጠኝነት ከሠራን እናሳካዋለን ነው ያሉት።
ሕልማችን ሊያሳክ የሚያስችል ጸጋ አለን፣ መሬት፣ አየር፣ የማዕድን ሃብት፣ ትኩስ ጉልበት ያለው ወጣት እና ሌሎች ሃብቶች አሉን፤ ሌሎች ሀገራት የማያገኙት ዕድልም አለን ብለዋል።
ከችግር ለመውጣት መቆጨት፣ ከተለመደው አሠራር መውጣት እና ፈጠራን መጠቀም ያስፈልጋል ነው ያሉት። ችግር የሚሻገር እና ያለን ጸጋ የሚጠቀም መሪ እንደሚያስፈልግም ተናግረዋል። እያንዳንዱን ሥራዎች ውጤታማ ለማድረግ መሥራት እንደሚጠበቅም አመላክተዋል።
የኢንዱስትሪን ጽንሰ ሃሳብ የሚረዳ መሪ እና ማኅበረሰብ መፍጠር እንደሚገባም አመላክተዋል። ኢንዱስትሪን መለማመድ፣ የሚጠይቀውን አቅም በመጠቀም ውጤታማ ሥራ መሥራት ያስፈልጋል ነው ያሉት።
ተስተካካይ እና ተወዳዳሪ ክልል ለመኾን ኢንዱስትሪ ላይ መሥራት እንደሚገባም አስገንዝበዋል። በግብርና ላይ ምርታማነትን በአግባቡ መጨመር በኢንዱስትሪ ላይ መቆናጠጥ ያስፈልጋል ብለዋል።
ከተሜነትን እና የከተማ ዕድገትን በአግባቡ መምራት እንደሚያስፈልግም አመላክተዋል። ከተሜነትን በተገቢው መንገድ መምራት ካልቻልን ፈተና እና አደጋ ይዞ ይመጣል ነው ያሉት። የከተማ ዕድገትን በአግባቡ በመምራት ቅንጡ ከተሞችን መገንባት እንደሚያስፈልግም ተናግረዋል።
ለቱሪዝም ዘርፉ ልዩ ትኩረት መስጠት ያስፈልጋል ያሉት ርእሰ መሥተዳድሩ አንዱ የምጣኔ ሃብት ማሳለጫ አድርጎ መሥራት እንደሚገባም አመላክተዋል። ኢንዱስትሪ ገጽታን የሚገነባ፣ ባሕል፣ ታሪክ እና ቅርስን የሚያስተዋውቅ፣ የጋራ ትርክትን የሚገነባ ነው ብለዋል።
በቱሪዝም ሃብት ለመጠቀም መጀመሪያ ያለውን ሃብት ለይቶ ማወቅ እንደሚያስፈልግም ተናግረዋል። የቱሪዝም ሃብቶችን መለየት፣ መጠበቅ፣ ማልማት እና ለጥቅም ማዋል ያስፈልጋል ነው ያሉት። የአማራ ክልል ያለውን ትልቅ የቱሪዝም አቅም በአግባቡ መጠቀም እንደሚያስፈልግም ተናግረዋል።
መሪዎች ተከታታይ እና ተደራሽ የኾነ የፖለቲካ እና የሕዝብ ግንኑነት ሥራ መሥራት ይጠበቅባቸዋል ያሉት ርእሰ መሥተዳድሩ ያቀድናቸው ዕቅዶች እና ግቦችን ለማሳካት ጠንካራ የፖለቲካ ሥራ መሥራት ያስፈልጋል ብለዋል። ለልማት እና ለመልካም አሥተዳደር የተመቸ የፖለቲካ ሥራ መሥራት እንደሚያስፈልግ ተናግረዋል።
ጠንካራ የፖለቲካ ሥራ በተቃራኒ የቆሙ ጽንፈኞችን፣ ከባዕዳን ጋር እየሠሩ ሀገርን ለመበታተን የሚሠሩ አካላትን ለማዳከም እንደሚያስችልም ገልጸዋል። ሌብነትን እና ሕገ ወጥነትን መቆጣጠር እንደሚያስፈልግም ተናግረዋል።
ሕዝብን ከሚጎዳ አካሄድ፣ ከኢኮኖሚ አሻጥር ራስን ማቀብ እና እንዲህ ዓይነት ድርጊቶችን መቆጣጠር ያስፈልጋል ብለዋል። የጸጥታ ኃይሉን ማጠናከር እና መገንባት እንደሚገባም ተናግረዋል።
የኢኮኖሚ ልማት ሥራዎችን በውጤታማነት እንዲመሩም አስገንዝበዋል። ለመስኖ ልማት፣ ለእንስሳት መኖ ዝግጅት ትኩረት እንዲሰጡም አሳስበዋል። የተፈጥሮ ሃብት ልማት ሥራም ትኩረት የሚሰጠው ነው ብለዋል። ለማዕድን ሃብት ልማትም ትኩረት ሰጥቶ መሥራት እንደሚገባ ተናግረዋል።
የንግድ ሥርዓቱን የሚቆጣጠር ሕገ ወጥነትን፣ ኮንትሮባንድን መቆጣጠር እና የገበያ ማዕከላትን መገንባት እንደሚገባ ገልጸዋል። ገቢን በአግባቡ እንዲሰበስቡም አሳስበዋል።
ተማሪዎች ወደ ትምህርት ቤት እንዲመጡ መሥራት ከመሪዎች እንደሚጠበቅ የተናገሩት ርእሰ መሥተዳድሩ የትምህርት ችግር በትውልድ ላይ ስብራት የሚፈጥር አደገኛ ችግር ነው ብለዋል።
ክልሉ በትምህርት ትልቅ አቅም አለው፤ ትልቁን አቅም እንጠቀመው፣ የሰው ሃብት ልማታችን ላይ እንሥራ ነው ያሉት። የትምህርት ተቋማት እንዲገነቡ፣ የተጎዱት እንዲጠገኑ ማድረግ እንደሚያስፈልግም ተናግረዋል።
ማኅበረሰቡ የጤና መድኅን ተጠቃሚ እንዲኾን በትኩረት እንዲሠሩም አስገንዝበዋል። የሴቶችን፣ የወጣቶችን፣ የሕጻናትን እና የአካል ጉዳተኞችን ተጠቃሚነት ለማረጋገጥ መሥራት እንደሚጠበቅም አመላክተዋል።
አገልግሎት አሰጣጥ ትኩረት እንዲሰጡ ያሳሰቡት ርእሰ መሥተዳድሩ ሕዝብ ከልማት በፊት የሚፈልገው አገልግሎት እንዲያገኝ ነው ብለዋል። አገልጋዮች በጊዜ እና በቦታቸው ተገኝተው ለሕዝብ ተገቢውን አገልግሎት እንዲሰጡም አሳስበዋል። ሌብነትን እና ሕገ ወጥነትን መከላከል እንደሚገባም አመላክተዋል።
የሪፎርም ሥራን በውጤታማነት እንዲተገብሩ ያሳሰቡት ርእሰ መሥተዳድሩ ስምንቱ ሪጂዮፖሊታንት ከተሞች መሶብ የአንድ ማዕከል አገልግሎት ማስጀመር አለባቸው ብለዋል። ሌሎች ከተሞችም ዝግጅት እንዲያደርጉ እና እንዲሠሩ አስገንዝበዋል።
